Les ruines

Si güei-na mio memoria - baxo la cuesta

suavemente pindia de mio casa,

y ye branu y esbrexa la xente na llosa

reidor y feliz

-como nel poema d'Horacio,esactamente -

y coles manes grandes y les duces palabres

na boca, inda non derroyíes

pola erosión de los años que pasen,

que pasarón, si baxo la cuesta, digo,

inda podré veme d'a caballo

con mio güelu,tengo ocho años,

camín del ríu

sentir la voz cotidiana y amiga,

cercana siempre,

mira,elli matarón a unos homes

que yeran de la república,

ya aquellos montes son los del Rebol.l.u

onde foza'l xabali ya ta enterrada

la cabra dorada de los mouros.

Pero güei namás voi sentir otra vuelta

esti vértigu, esti pulsu inesactu

que golpea levemente les vidayes,que fura

pelo escuros del nuesu adientro.

Y miro pela ventana y nun hai nada,nada

qu'a la vista invite o la memoria torne,

palabres gastaes repitiendose,

les ruines d'una edá

que perdiemos por descuidu.

Ciega la lluz iluminando

l'interior d'una casa abandonada.